საქართველოს მომავალი საპარლამენტო არჩევნები და რუსეთის ნეგატიური როლი

 

საქართველოს მომავალი საპარლამენტო არჩევნები და რუსეთის ნეგატიური როლი

 

ნიკა ჩიტაძე 

შავი ზღვის საერთაშორისო უნივერსიტეტთან არსებული საერთაშორისო კვლევების ცენტრის დირექტორი 

საქართველოს საპარლამენტო არჩევნებთან დაკავშირებით აუცილებელია აღინიშნოს, რომ უკანასკნელ პერიოდში გამოქვეყნებული ბევრი ანგარიში თანახმად, რუსეთი კვლავ ცდილობს საქართველოს შიდა საქმეებში ჩარევის ფარგლებში ზემოქმედება მოახდინოს წინაარჩევნო პროცესზე და მთლიანად არჩევნებზე. კერძოდ, კრემლის მიერ ჩამოყალიბებულია სქემა, რომელიც დეზინფორმაციულ ხასიათს ატარებს -  უკანონო ფინანსური ქმედებების, ასევე კიბერთავდასხმების კომბინაციას წარმოადგენს.

 

როგორც ქართული, ასევე ფართო საერთაშორისო საზოგადობისათვის რამდენიმე ანგარიშის გამოქვეყნების შედეგად ცნობილია, რომ ევროპაში დეზინფორმაციული აქტივობის დიდი ნაწილი რუსეთიდან მომდინარეობს. მაგალითად, ფუნქციონირებს რუსეთის სამხედრო ძალებთან დაკავშირებული ქსელი, რომელიც ჩართული იყო კოორდინირებულ არავთენტურ ქმედებაში, რომელიც მიმართული იყო საქართველოს წინააღმდეგ.

 

მოსკოვის მთავარი მიზანია, დემოკრატიულ სამყაროში მიმდინარე არჩევნებისა და რეფერენდუმების პროცესში, მათ შორის, ამერიკის შეერთებულ შტატებში, საფრანგეთში, ნიდერლანდებში, ესპანეთში (კატალონია) ავსტრალიაში, ჩრდილოეთ მაკედონიაში, ბრიტანეთში, მონტენეგროსა და სხვა ქვეყნებში აქტიური ჩარევა. თავის მხრივ, რუსეთი, რომელიც საქართველოს სახელმწიფოებრიობის დასუსტებითაა დაინტერესებული, დიდი ყურადღებით აკვირდება საქართველოს მომავალ საპარლამენტო არჩევნებს.

 

საინტერესოა აღინიშნოს, რომ დაახლოებით ერთი თვის წინ, ტრანსატლანტიკურმა კომისიამ წარმოადგინა დათქმა არჩევნებში კეთილსინდისიერი მონაწილეობის შესახებ, რაც თავის მხრივ გამჭვირვალე და ჯანსაღი საარჩევნო პროცესის გლობალურ სტანდარტს წარმოადგენს. მნიშვნელოვანია ხაზი გაესვას იმ გარემოებას, რომ კომისიამ საქართველოში არსებულ პოლიტიკურ პარტიებსა და კანდიდატებს დათქმაზე ხელისმოწერისკენ მოუწოდა.

 

ტრანსატლანტიკური კომისიის მიერ წარმოდგენილი რეკომენდაციის მიზანს წარმოადგენს საერთაშორისო ჩარევის რისკის შემცირება და საქართველოს დემოკრატიულობის მდგრადობის ზრდა საერთაშორისო გავლენების წინააღმდეგ ბრძოლაში. სწორედ ამიტომ, დათქმის ფარგლებში კანდიდატებს მიეცათ რეკომენდაცია, რომ „ჩარევით დაინტერესებულ პირებს მტკიცედ განუცხადონ, რომ უარს ამბობენ პირდაპირ თუ არაპირდაპირ დახმარებაზე უცხო ქვეყნის მხრიდან“. დოკუმენტში წარმოდგენილი მოთხოვნები უკავშირდება ნებისმიერ კანდიდატს, რომელსაც სურს ღირსეული საარჩევნო კამპანიის წარმოება. შესაბამისად, კანდიდატებმა არ უნდა გამოიყენონ მონაცემები, რომლებიც შეიძლება იყოს მოპარული, ასევე არ უნდა გაავრცელონ გაყალბებული აუდიო ან ვიდეომესიჯები, როგორიც არის „ფეიკ ვიდეოები“. ხოლო ინფორმაცია, თუ თუ საიდან მოდის მათი კამპანიის დაფინანსება, უნდა იყოს გამჭვირვალე.

 

მისასალმებელია ის ფაქტი, რომ საქართველოს ხუთმა პარტიამ უკვე მოაწერა ხელი დათქმას და ესენი არიან: „ქართული ოცნება“, „ევროპული საქართველო“, „სტრატეგია აღმაშენებელი“, „ერთიანი საქართველო“ და „ლელო საქართველოსთვის“.